حلمي راجل والسلام (ج1)






الجزءالاول

لواليدة أنا غادية نفوج.قادات نضاضرها وجبدات الخيط بشوييية عليها بدات مضاربة معاه باغة دخلو فليبرة ديال الطرز : نعام ابنتي ؟وفين بالسلامة!كندور وسط لمراح وممسالياش، فْ هاواي ،،غادية نتفجج فالحمام ...فيناهوا الصابون البلدي باسم الله الرحمان الرحيم لبارح حطيتو بايدي هنا،،مّي علاش كتبعيني للكوزينة لي حطيتها دوزي مورايا تهزيها وتعاودي تحطيها فشي قنت وانتي فيك الزهايمر!مّي باقية مضاربة مع ليبرة : وشوفي غير تم مالو بغايدير الرجلين !بديت كنقرقب فالكوزينة : وانتي لي عندك الرجلين ا مّي ...نتي ،،اه لقيتو هاهوا لحتو فالسطل مع خوتو وبديت كنلبس فجلابتي طلات علي مي من تحت النضاضر : ايوا ايمتى ترجعي؟هزيت راسي فالساعة لي فوق راس الواليدة : امم هادي دابا لعشرة وربع قولي ديك الربعة نكون هنا!خرجات فيا مي عينيها : هاويلي ناس كيدوزو 4 سوايع فالحمام ونتي باغا تسكني فيه..والله وماتجيني ف جوج يحتا نلحڭ عليك،والله ايما كسلتك ابنتي ا خدوج يامنتسماش أنا اسمهان مرات العربي !هزيت السوارت من فوق الثلاجة: واسميتك نعيمة ا مّي واتي فوتي عليك اسمهان مابانت ليك غير هيا،،واقيلة نديرو غدا شي ضريبة عند الطبيب دوك الفيزيبلات عندك مآمزيرينش!بدات كتغوت،غير كنجبد ليها الطبيب كتبدا تخاصم : هادي هي تشدي ليا بايدي وتديني لحمام معاك تا انا نسخن عضامي؟دخلت عندها لبيت : بست ليها على راسها وتحنيت بست ليها ايديها : هه الله يهديك آلواليدة واغير لبارح كنتي فيه،هانتي نسيتي..!هزات راسها فكّات فولارها لبيض لقات راسها دايرة فولار ديال لحمام...وراسها كتفوح منو ريحة القرونفل والاورد والاعشاب البحرية...قاديت ليها الفولار. : ههه وهانتي امي راه سهام ختي غتجي عندك دابا شوية تفطر معاك ولغدا وكلشي وهانا مشيت وعقلي عليا،،ملي نجي سوليني شكون انا!بدات كتضحك : نسى بنتي مالني تسطيت ايوا بالصحة ماتعطليش !خرجت وأنا ناوية نطلع من الحمام شهادة السكنة ... 


مافهمتش الرجال كيديرو ساعة ولا كترو ساعة ونص وكيقوليك اي لحمام سخفني ...انا واحد لمرة خرجت فالصباح بقيت حتى سديت لحمام مع الطيابة عاد جيت ،كتحط لغدا تعيط ليا نتغدا ونرجع لشوط الثاني وتحط الكاسكروط تعيط ليا ولعشا شي حاجة خفيفة!وماكرهتش نكون طيابة مانخرجش من الحمام!دخلت لسخون : اي اي عامر باسم الله الرحمان الرحيم،هادو ماعندهم ولاد يوجدو ليهم غدا،ماعندهم رجال يصبنو ماعندهم ديور يسيقو...اراك لسخون دخلت كنسلم على الطيابات ولكسالات وصحاباتي الرفقة الصالحة...شديت بلاصة وحدة باقة ماكملاتش التشلالجات كتبندر عليا : الالة بلاصتي هادي هزيت فيها راسي : نعام لالا ماشي بلاصتك وجبدت الدوزان "الحنة ولحامض" كنقاد فيهم !ضربات السطل برجلها،خنزرت فيها دارت ايديها على جنبها وبدات كتعوج : الله يستر بنادم ماكيعرفش النضام لحت داكشي من ايدي ونضت تا انا: لآالة ولالي ومالي ومال تقرقيب سطالي،،هاه شوفي ديك فليفلة والله وماتمشي ياحتى نجدب عليك!بقات كتخنزر ومشات وأنا بديت كنكمل لمهمة!كنتجبآد وداني نعاس شي ساعة،،لعيالات كيسخفو فالسخون وأنا حالفة يسخف السخون وأنا مانسخف..ساليت التحميمة بالمراسم والطقوس وڭالسة ونزغرت غير بحدي، مع صحاباتي الطيابات والكسالات كل ساعة جايين يجمعو معايا لعيالات مايسحابليهم غير عروسة!خرجت وريحة الورد والقرنفل تعطعط طليت على الساعة لي على برا : هادي 4 ايوا الحمد لله ماطولتش جبدت الليمون وبديت كندير الديسير،،بانت ليا كريمة جاية !هه ايوا بصحة كيف داير لحمام؟خنزرت فيها: الله يعطيك الصحة! بارد وعامر وماكاينش فين تحطي رجليك كون غير جيتي تال غدا !بدات كتضحك والسم خارج من عينيها : هه تبارك الله منورة،،أنا مافهمتش الزين والتباتة و34 عام وباقة ماجاش فيك ولد الناس !تحنيت هزيت سطولتي وشفت فيها : ايوا الله يحفظني من عين بنادم،خارجة مع الباب وأنا كنقرا فالقرآن..وصلت لدار ،طوموبيل ديال راجل ختي واقفة عند الباب : خديت النفس وخرجتها ،،حليت لباب سمعت الواليدة : اشكون؟


هاويلي شكون عندو سوارت داري المعطي ماعاطيهم ؟ لحد دخلت سلمت عليها: اشكون نتي وجاية تسلمي عليا تعرفيني ؟بست ليها على راسها : ماكتعرفيني ماكنعرفك أنا جاية طالبة ضيف الله عنقاتني : ايوا مرحبا بضيف الله جيت نسلم على ختي بدات كتخنزر : خديجة راه هاد التصرفات هوما لي خارجين على منا فعيواض تعاونيها تفكر شكون نتي باركة كدوخي فيهاشفت فيها : راه عرفاني غير كنبغي نضحك معاها مابقا حد يضحك؟كيدايرة اختي توحشناك،والدراري مابانوش ليا!جاوباتني بالنفخة : على برا كيلعبو،،الحمد لله!ناضت لواليدة لبيتها وبقيت انا وختي فالصالون،،،ساكتين،،،حتى عيات سهام وقالت لي : ايوا ايمتا غنقسمو داك الورث؟خوتك مصدعيني!جاوبتها بلامبالاة : اشمن ورث،،راه غير الدار لي حنا فيها وارض لي بقاو وفسمية لواليدة،،شني بغيتو تورتوها وهي حية؟خنزرات فيا : ايوا خوتك عندهم ولادهم وديورهم وباغيين رزقهم ..وحتى انا معاهم ضحكت بسخرية : هاه قالت ليك ولادهم،اقولي عيالاتهم كيحرشوهم،ونتي مالك راجلك تاهو كيحرشك؟فيناهو جا ومشا اودي على الرجلة مقد حتى يدوز نص نهار مع عائلة مرتو بآز !جاوباتني : والله اختي لضحكتيني،ويلا كنتي حاسدانا ديري بحالنا،تزوجي وديري دارك..وولادك،،باش حتى نتي تبداي تحسي شوية،،ههه ولكن سمحيلي شكون غيقبل عليك...نتي اصلا فاتك التران،،شكون لي يبغي يتزوج بوحدة عندها 35 عام..ايلا طفرتيه هاوجهي..تحركي شوية وضبري على شي بوهالي يقبل عليك اوف ماجاوبتش بقيت فبلاصتي ساكتة وبدون حراك...كنسمع لكل كلمة قالتها كتجرحني فقلبي..!نضت بالزربة جمعت السينية...داريت دموعي ..دخلت لكوزينة رديت لباب وبكيت،،ڭلست فالارض بشدة لبكا...وليت معيارة..ايقولي لي كان هاد الهدرة نقدر نوقف ونواجهو..ولكن من اقرب الناس؟ختي..ماقدرتش نتقبلها..لي كيصبرني هو أنا الزواج مشيئة وديما كنصبر راسي بانتظاري لما هو خير!خرجت من الكوزينة لقيتها كتجمع فحوايجها تمشي بحالها،،ودعتها..وسديت لباب وأنا عقلي عاقل غير على هدرتها فقت فالصباح صليت،فطرت وخرجت لخدمة!وأنا عندي أمل أنني نتلاقى مع ولد الناس لي يستحقني


شاركي على غوغل بلاس