قصة الحقد والحسد ج2








سفيان: صافي أناخاصني نمشي للبوليس.. هبة: عندااااك..منصحكش..غتقتل ولدك بيدك.. وفاء: واش انت باغي تقتل لي ولدي.. البوليس لااا... سفيان:اوا وشنو الحل؛! وفاء: الحل هو الفلوس يوجدو.. خرج سفيان وخبط الباب.. كان غيتفركع بالفقصة.. هبة:الله يدير ليكم اللي فيها الخير.. راه القضية صعيبة!! و إياد معذب.. وفاء: (بدات تتبكي) تقهرت ياختي والله مابقيت عارفة ماندير..حتى سفيان طلع ليه الدم .. ومعرفتش شنو ممكن يدير.. هبة: ديرو ليهم تنازل على الأرض.. اللي شريتو .. وفاء: بصح.. هذا حل زوين..غنتاصل بسفيان ونقولهالو.. اتاصلات وفاء بسفيان .. وفاء: سفيان فينك!!! سفيان: فالقهوة علاش؟! وفاء: آجي للدار دابا عافاك.. لقيت واحد الحل نتناقشو فيه.. سفيان: الله يسمعنا خير..أنا جاي.. هبة: الحمد لله مللي فكرنا فهاد الحل.. وفاء: ياربي غير يقبلو.. دازت شي ربع ساعة وهو يجي سفيان للدار.. دخل للبيت عند وفاء .. سفيان: ياك لاباس شنو الحل اللي لقيتي وفاء: فاش غيعيطو عوتاني غنشرح لبهم المشكلة وغنقوليهم غنتنازلو على الأرض ليكم .. بيعوها وخودو الفلوس.. وفاش نتنازلو عليها ليكم عطيونا ولدنا.. سفيان: أش غنقوليك واخا ديك الأرض خديتها بالشهوة.. ولكن ماشي خسارة فولدي.. صافي يتاصلو ونطلبو منهم يوافقو.. هبة: ان شاء الله غيكون خير..غير متخليوهمش يقتلو ليكم ولدكم.. سفيان: يله نوضو نخرجو برا حدا العائلة وفاء: واخا.. المهم بقاو مجموعين وتيتأملو يعيط ليهم اللي خطف.. داز الليل والكل سهران..والغد ليه صونا التلفون على الصباح.. وفاء: ألووووو... مجهول: (وفاء تتسمع إياد تيبكي وتيقول ماماااا مامااا..) وفاء:(طاحت على ركابيها وبدات تبكي وتقول)إياااد!!!ولدي..ولدي..ألوووو عافاكم متآذوهش مالو تيبكي.. مجهول: سمعتي ولدك!!! صدع لينا راسنا ولكن قريب غنقطعو ليه الحس .. الى ماجاوناش الفلوس.. وفاء: خويا عافاك سمعني.. حنا عندنا أرض.. وإلى بغينا نبيعوها خاصها الوقت تقدر توصل تالعام زائد الإجراءات.. فكرنا نتنازلو عليها ليكم او ليك معرفناش شحال نتوما.. وتعطيونا ولدنا.. مجهول: نفكرو ونردو عليك.. طوط..طوط..طوط..طوط..طوط.. وفاء: إمتى غتردو عليا ..؟؟ ألو ..ألووو.. قطعو تاني ...تفوووو..مرضوني.. وولدي تيبكي.. بغيت ربي ينتاقم منهم.. حيوانات.. هبة: تهدني شوية أحبيبة دابا يصاوب الله على الأقل كاين أمل يوافقو.. سفيان: كون طاحو فإيدي كون قتلتهم.. هبة: ربي اللي غيحاسبهم.. غير تهناو.. المهم دازت شي ساعة وهوما يعاودو يعيطو.. وفاء غادية جهة التلفون ويديها تيترعدو وخايفة تسمع خبار تكمل عليها.. وفاء: أ..أ..أل..ألوو.. مجهول: وافقنا على اقتراحكم..
غدا يجي راجلك حدا مدرسة الأمل.. وفاش يوصل غيلقا واحد الطونوبيل حمرا .. غيركب فيها غتكون محلولة.. غيلقى حداه واحد التوب كحل غيسد بيه عينيه مزيان ويتسنى.. ومينساش يجيب معاه الاوراق كاملة والتنازل مكتوب وحنا غنكتبو الإسم ديال اللي غيتنازل ليه.. ونكملو الاجراءات عند العدول.. وديري فبالك باللي إلى حاولتو تدخلو البوليس أو تبغيو تقولبونا.. ولدكم ودعوه .. وفاء: واخا..واخا.. كون هاني ولكن كيفاش غناخذو ولدنا..!! فاش غتكمل الاجراءات غادي نحطوه حداه فديك الطونوبيل.. غادي يهزو ويجيبو..متنسايش غدا مع 2 ديال العشية..طوط..طوط..طوط.. وفاء: واخا.. ألو..ألووو..قطع.. عاودات ليهم وفاء كلشي داكشي اللي قالو ليها بالحرف
سفيان: واخا يكون خير. ان شاء الله.. ديك الليلة دازت عليهم بحال العام.. وماوصل الغد ليه حتى تقهرو بالإنتظار.. وغير ضربات الوحدة ونص وهو ينوض سفيان.. وفاء: الله معاك أسفيان. .وعافاك بلا منوصيك متدخلش البوليس فهادشي. . سفيان: متخافيش..غندير داكشي اللي بغاو ولدي مارخيصش عندي.. هبة: الله معاك أخويا سفيان.. والكل بقا يدعي معاه .. ومشا سفيان لحدا ديك المدرسة بقا تيدور فعينيه حتى بانت ليه واحد الطونوبيل حمرا كيف قالو ليهم.. بقا تيشوف فيها .. شوية وهو يقرب منها وحاول يحلها .. وفعلا لقاها محلولة.. دخل ليها وقلبو تيضرب ف 90 بالخلعة.. وهو يلقا فيها واحد البانضا كحلة دارها على عينيه.. وبقى يتسنى.. شوية طلع شي حد للطونوبيل..وديمارا.. وقاليه.. المجهول: غتبقى مغطي عينيك.. سفيان: فين غاديين بي؟! المجهول: متسولش بزاف.. غنبعدو على الناس باش نتكاتبو..أصلا غنجيبو واحد العدول ديالنا .. غيكتب لينا التنازل ويوثقو.. سفيان: واخا.. أهم حاجة ولدي يرجع لي.. المجهول: إلى تبعتي كل التعليمات غتديه معاك.. أما إلى حاولتي تلعب بذيلك كون مأكد أن الجنازة غتولي 2 جنازات .. وحدة ليك ووحدة لولدك.. سفيان: واخا.. بقاو غاديين واحد المسافة.. وشوية وهوما يوقفو.. المجهول: غادي يطلع حداك العدول عطيه الوثائق باش يقاد التنازل وتسني عليه..واخا؟ سفيان: واخا.. المهم دازو الإجراءات كيف بغاو دوك العصابة وتم التنازل رسميا على الأرض لفائدة واحد الإسم اللي معرفوش سفيان.. العدول: صافي كلشي مقاد وغدا غندخلها للمحافظة بهاد الإسم ديال المالك الجديد.. المجهول: مزيان.. المهم شوف.. تسنى هنا ربع ساعة وغنجيبو ليك ولدك ومتحل عينيك حتى لعلى 5 الدقايق.. وهز ولدك وغبر من هنا.. سفيان: واخا تنتسناكم عنداكم تغشوني.. المجهول: كلمة الرجال الساط.. بقى سفيان تيتسنى.. حتى جابو ليه ولدو وغير سمعو تيبكي ومقدرش يصبر ولكن كان خاصو يصبر 5 الدقايق.. دازت ديك 5 الدقايق.. و حل سفيان عينيه.. لقى ولدو قدامو مقدرش يحبس دموعو.. هزو وبقى يبكي.. وخرج تيجري من الطونوبيل.. وشاد ولدو مزياااان .. غير وصل للشارع.. شد طاكسي ورجع لدارو.. دق الباب..حلات ليه هبة.. هبة: حبيبي ...حبيب خالتو رجعتي لينا بالسلامة .. الكل خرج تيجري عندهم.. ووفاء.. تلاحت على ولدها .. وبقات تعنق فيه وتبوس فيه.. وفاء: وللللدي توحشتك.. شنو دارو ليك دوك الحيوانات..الحمد لله مللي رجعتي لي أولدي.. شكرا بزااااف أسفياااان.. كون ما انت مغيرجعش لي ولدي.. سفيان: الحمد لله.. كنت خايف لا يخليوني نتنازل ليهم على الأرض..وميعطيونيش الولد.. هبة: الحمد لله على سلامتو.. يله نخليكم دابا تاندوز . باش نطمأن عليكم.. وفاء: لهلا يخطيك أختي وقفتي معايا وخليتي دارك وراجلك.. هبة: أويلي الدنيا هانيا..يله الله يحفظو ليكم. .. دوشي ليه ووكليه ونعسيه يرتاح وفاء:عيني نعطيهم ليه.. الحمد لله مللي رجع لي وليدي.. ناضو عائلة سفيان و وفاء تاهوما بغاو يمشيو.. وفاء وسفيان سلمو على كلشي.. وشكرو الكل على وقفتهم معاهم.. سدو الباب من بعد مامشى الجميع.. ودخلو.. سفيان: إياد بانلي عيان 
من بعد ما كملات وفاء ونعسات ولدها وجدات العشا لسفيان وجات تتعشى معاه.. سفيان: فالصراحة..أنا مابقاش في الفلوس اللي حطيت على ود ولدي.. ولكن بقات في الشمتة ديال هذا اللي كان قاني لي على داك الرزيق ياخذو مني.. قريب ولا بعيد.. معرفتش.. شكون هذا اللي كان حاسدني..!! وفاء: وممكن ميكونش هادشي.. اللي تتقول..!! ويكون شي حد متيعرفناش أصلا.. سفيان: واش نتي شوية لاباس..!! متيعرفناش ولقى نمرتك.. كيفاش غيكونو وصلو ليها!! وفاء: كلشي هاد الأسئلة اللي تطيح ليك فبالك كنا غنعرفو جوابها..كون دخلنا البوليس فهاد القضية.. سفيان: عرفت.. مقدرناش نغامرو .. بحياة ولدنا.. وفاء: هذا اللي خدا لينا رزقنا بغيتو مايتهناش بيه ويبليه الله بشي بلاء اللي عمرو يبرا منو.. الله ياخذ فيه الحق.. سفيان: آمين..المهم يله نعسو ونرتاحو راه شحال مارتاحينا ولا نعسنا.. وفاء: بصح.. العيا قتلنا.. أنا غنجمع هاد الماعن .. وننعس غير سير انت ارتاح.. المهم سفيان رجع للخدمة ديالو كيف كان عادي .. ووفاء ولات مضاعفة بآلاف المرات المراقبة ديالها لولدها لدرجة أنها متتقدرش تغفل عليه ولو للحظة.. المهم واحد النهار جات تشوفها ختها هبة.. ودقات عليها وخلات ليها وفاء الباب.. هبة: حبيبة توحشتك..كيديرين.. وكيداير إياد!؟؟.. وفاء:(عنقاتها) حتى أنا والله...لاباس الحمد لله والله.. هبة: شفتك مبقيتيش تهبطي لعند ماما بزااف ومتتجيش عندي.. وفاء: آش غنقوليك..من داك النهار وليت تنخاف.. مبقيتش تنقدر نخرج إياد معايا.. ومتنقدرش نخليه فالدار ..بوحدو داكشي علاش درت بناقص الخروج.. هبة: أويلي!! حمقة.. متبقايش رادة البال اكثر من القياس..صافي حادث ووقع.. يله نوضي نخرجو .. نشوفو دوك الطلامط اللي قلت ليك.. راه مبغيتش نمشي بوحدي حتى تكوني معايا.. وفاء: وتقولي آختي.. بلا متبززي عليا.. مغنمشيش معاك.. هبة: واخا..واخا.. مغنبززش عليك.. غير ارتاحي.. المهم اليوم الصباح مشيت شفت الطبيب.. وقالي عندي بنية.. وفاء: وااو مبروك ألالة.. هي خطيبة ولدي جاية.. ههههه.. هبة: اوا..مكرهناش..فين نلقاو ليها عريس بحال السي إياد.. وفاء: اوا الله يفكك على خير.. هبة: آمين أختي.. وفاء: اوا نوض نديرو شي قهيوة.. ناضت وفاء ودارت قهوة لختها شرباتها ومن بعد نص ساعة عتاذرات منها ومشات فحالها..أما وفاء بقات منشاغلة فأعمال الدار.. والكوزينة.. حتى جا راجلها..يتغذى.. بقات الحياة مستمرة على هاد النحو مدة 4 شهور..وواحد النهار .. دخل سفيان من الخدمة كيف العادة.. لقى وفاء موجدة راسها. وموجدة ولدها باش يخرجو يتغذاو على برا.. سفيان: موجدتيش الغذا؟! وفاء: لا.. اليوم بغيت نخرج نبدل الجو..
من نهار الحادث مابقيت خرجت..ومللي انت معايا.. غنطمئن على ولدي.. سفيان: واخا أحبيبة.. مرحبا.. ونيت بغيت نقترح عليك واحد الحاجة..طاحت لي فبالي.. ومعرفتش علاش ماطاحتش لي فبالي من مورا الحادث.. وفاء: ياك لاباس.. سفيان: غير يله.. من بعد ونقولهاليك.. المهم خرجو ومشاو وشراو غداهم ومشاو لحديقة الحيوانات باش يتغذاو تماك.. دارو مزيان.. وتغذاو .. وجلسو يرتاحو فواحد البلاصة.. وتماك سولاتو وفاء.. وفاء: اوا!! مازال مغتقول لي شنو الموضوع اللي طاحليك فبالك.._!!! سفيان: غنقوليك أحبيبة..فكرت  باللي خطف لي ولدي ولا ساهل عليا نعرفو.. وفاء: تتهضر بصح!!!!! وكيفاش غتعرفو!!!! سفيان: هذا اللي خذا الأرض غيكون دخل بإسمو للمحافظة وأنا غنمشي للمحافظة وغادي نسول على رقم البقعة بإسم شكون ..!! وفاء: فكرة زوينة والله.. غدا سير.. سفيان: إن شاء الله..المهم خللي الموضوع بيني وبينك واخا؟! وفاء: كون هاني مغنقولها لحتى واحد.. وداكشي اللي كان..الغد ليه غير فاق سفيان مشا للمحافظة .. باش يسول.. من هاد المكتب لهاد المكتب كل واحد يصيفطو لواحد حتى لقى واحد الموظفة اللي وقفات معاه حتى لقات ليه الرقم.. الموظفة: واخا أسيدي.. هاد البقعة فطور التحفيظ مازال ماكملو ليها الإجراءات.. سفيان: ولكن بإسم من كاينة!!! الموظفة: سمحلي واحد الدقيقة.. نشوفليك .. بقا سفيان تيتسنى شوية قالت لو الموظفة.. الموظفة:بإسم هبة العمراني.. سفيان: ك..ك..كييفاش!!!! مفهمتش!!! غير تأكدي أختي غتكوني غير غلطتي.. الموظفة: لا أسيدي.. هادشي اللي مكتوب.. باللي البيع تم لصالح هاد السيدة .. وعلى العموم غنسول ليك المدير.. تفضل معايا ندخلو عندو.. مللي دقو على المدير لقاوه مشغول وتسناوه تيسالي.. شي 10 الدقايق.. وسولوه على إسم صاحب البقعة.. المدير: كيف ما قالت ليك الموظفة أسيدي.. هبة العمراني..علاش كاين شي مشكل؟!!! سفيان: شكرا أسيدي..مع السلامة.. المدير: بالمناسبة.. عاد كانت البارح هنا باش تكمل إجراءات التحفيظ.. سفيان: كنشكرك مرة أخرى.. مع السلامة.. خرج سفيان من المحافظة وهو مصدوم مابقاش فاهم شنو واقع.. واش حتى لهاد الدرجة الإنسان ماتليه الضمير.. واش حتى لهاد الدرجة ممكن تكون شي أخت بهاد الحقد وبهاد المكر.. تخطف ولد ختها وتمثل هاد التمثيلية كلها علينا على ود الفلوس..مابقاش عارف بإنى وجه غيعاود لمرتو هادشي اللي سمع.. بقا غادي وكل خطوة تيخطيها تيحس براسو بحال الى غادي للعافية.. فكر..وعاود فكر ومالقا حتى حل من غير أنو يعاود الحقيقة لمراتو ويخليها هي تتصرف مع ختها اللي متستاهلش حتى كلمة ختي.. غير وصل للدار ودموعو بداو تينزلو حيت حس بالجرح اللي غتجرح وفاء فاش غتعرف الجواب ديال سؤالها: شكون اللي سرق لي ولدي. اللي جوابو هو : ختك هبة.. وفاء: سفيان!!!! مالك؟؟؟ سفيان: حاس براسي مخنوق والله(عنق وفاء) .. وفاء: حبيبي عاودلي مالك.. سفيان: ندخلو للداخل ونهضرو.. وعافاك عتقيني بكاس ديال الما راه ريقي نشف.. وفاء مشات تتجري جابت لراجلها كاس ديال الما.. وفاء: جلس أحبيبي .. هاك باسم الله اشرب.. سفيان: أوف الحمد لله.. قلبي غيسكت.. وفاء: إوا!!! شنو اللي خلاك فهاد الحالة؟ سفيان: سمعيني مزيااان أ وفاء 
أنا عرفت اليوم شكون اللي خطف ولدنا.. ولا شكون اللي كرا الناس اللي خطفو ولدنا.. وفاء: وشكون؟!! سفيان:وفاء!! عافاك متتصدميش حيت هاد الشخص قريب منا بزااااااف.. وفاء: غير قول شكوووون!!! سفيان: هادي اللي محناتنا هاكة ختك.. اختك هبة..

يتبع.....

شاركي على غوغل بلاس