قصة الحقد والحسد الجزء الأخير







وفاء: ههههههه ضحكتيني والله أش تتقول.. انت.. سفيان: مضحكيش حيت هادشي بصح فالمحافظة لقيت باللي الأرض بإسمها.. وفاء: كيفاش زعما!! ختي هي اللي طعناتني فظهري ومثلات عليا هاد المدة كاملة.. ولكن علاش؟!!علاش غتدير هادشي..!! لا لا لا شي خطأ كاين ختي ميمكنش تغدرني حتى لهاد الدرجة .. ختي ميمكنش تشوف كبدتي محروقة على ولدي و تبقى تتفرج عليا.. تأكدتي؟! سفيان: باراكا.. تانا متقتش ولكن دخلت عند المدير وأكدلي وقالي راها جات غير البارح حيت تتقاد وراق التحفيظ.. وفاء حلات فمها وتصدمات وبدات تتسرى معاها باللي ختها طعناتها وغدراتها .. بقات تتبكي وتترجع فالسينتا.. وفاء: ميمكنش.. هادي ميمكنش تكون أخت.. هادي شيطانة.. كيفاش قدرات تقتلني وأنا حية!! كيفاش؛؛!! سفيان: بنادم الله يستر على ود الفلوس تيولي اكثر من الشيطان وفاء: واش الدنيا خيابت تالهاد الدرجة راه اللي تتهضر عليها ختي ماشي صاحبتي ولا معرفة.. خرجنا من كرش وحدة و تربينا فدار وحدة.. دابا عاد بديت تنفهم بزاف ديال الحوايج. . عرفت علاش كانت تتقولي انتي اللي عايشة.. انتي اللي كدا.. وأنا متندي متنجيب.. الساعة هي كانت حاسداني حتى على الضحكة.. معرفتش لمن خرجات بهاد الشر.. عافاك أسفيان لما قولي باللي هادشي كللو كذوب.. سفيان: للأسف هادشي ماشي كذوب.. هادشي بصح.. وفاء: شنو غنديرو دابا؟!! سفيان: غدا عيطي ليها باش تجي تتغدا معانا.. نيت راها تقلات غتكون قريبة تولد ولا منعرف.. وفاء: آه قريبة تولد.. وأنا اللي كنت هازة ليها الهم.. وتنوجد ليها فالحلوى.. ياربي كيفاش غنقدر نعيش مع هاد الصدمة.. سفيان: سمعيني.. عيطي ليها للغدا وديك الساعة غنواجهوها بكلشي.. وفاء: واخا.. دابا شوية غنعيط ليها تجي تتغدا معانا.. تاكل فيه السم.. سفيان: السم فيها خلوووق.. اللي تدير هاد الفعايل.. ديال اللفعات السامات .. ماشي مسمومة.!! ولكن ربي غيخلص كل واحد.. غنواجهوها ونشوفو ردة فعلها.. وفاء: واخا.. إوا نوض نتاصل بيها.. عيطات وفاء لهبة وطلبات منها تجي تتغذا معاها غدا.. ووافقات بكل سرور.. الغد ليه ناضت وفاء تتوجد فالغذا.. وفاش قربات تجي هبة وجدات شلاظة وفطبسيل هبة دردرات فوقو السم ديال الفار.. هبة بدات تدق.. وفاء حلات عليها الباب.. وفاء: أهلا بختي الحبيبة.. هبة: كيدرتي أختيتو توحشتكم.... وفاء: كون شفتي أنا شحال موحشاك داكشي علاش قلت نعرض عليك للغذا اليوم.. هبة: لهلا يخطيك عليا أختي العزيزة.. وفاء: حتى انتي..غير يوصل سفيان نتغذاو واخا؟! هبة: الدنيا هانيا.. المهم جا سفيان وحطات وفاء الغذا وحتى بغاو يبداو وقالت ليهم سمحولي نسيت شلاظة..جابتها وحطات طبسيل قدامها وطبسيل قدام سفيان ومشات تجيب الطبسيل الثالت..اللي فيه السم.. حطاتو قدام هبة.. وفاء: مرحبا بيك أختي.. هبة: هههه على أنا برانية تتعرضي عليا.. ههههه يله هزات هبة الفورشيطة بغات تدير الدغمة الاولى ديال الشلاظة ففمها وهي تقوليها وفاء: وفاء: حبسي...متاكليهاش.. حطات هبة الفورشيطة..وقالت: هبة: مفهمتش مالك؟! وفاء: مبغيتكش تاكليه حيت حاطة ليك فيه السم..فهمتي دابا؟! هبة وقفات مخلوعة .. هبة: السم..!!! واش حماقيتي..؟! باغا تقتليني ولا شنو؟!! وفاء: أنا مازال حنيت فيك ومقدرتش نخليك تاكليه أما نتي .. شفتيني قدامك تنتقطع وباركة تمثلي عليا..نتي اللي خطفتي ولدي وباركة ترسمي لي البراءة هبة: واقيلة راك حماقيتي.. سيري تيرجع ليك عقلك ونهضرو.. سفيان:(بصوت مرتفع) هبة!!!! جلسي هبة: واش حماقيتو نتوما!! واش أنا مسطية نخطف ولدكم .. اوا الله يستر . وقفنا معاكم رديتونا شفارين.. وفاء: سفيان مشا للمحافظة وشاف سميتك على الأرض اللي عطا للعصابة.. مازال باغا تنكري؟؟؟؟ هبة:(جلسات من هول الصدمة).. سفيان: علاش!! علاش درتي فينا هادشي أهبة؟!! هبة: أنا..أنا.. وفاء: شنو غتقولي مازال؟!! واش عرفتي شنو درتي فختك؟!! قتلتيها ودمرتيها وخليتيها عندها فوبيا من الخروج بصفة عامة .. واش عرفتي أنك قتلتي الحلم اللي كان عند راجل ختك باللي تكون عندو فيلا.. واش عرفتي أنك خليتي ختك تتنوض كل نهار من فراشها مخلوعة وتتغوت ولدي لا متديوهش!!! واش عرفتي باللي ختك خاصها تتعالج عند طبيب نفساني باش تقدر تتجاوز صدمة خطف ولدها وصدمة خطف ختها لولدها..واش عرفتي باللي كنت ممكن نشك فالعالم كللو إلا نتي!!! عرفتي هادشي ولا لا!!! محال تعرفيه.. حيت نتي أصلا ماشي بنادم.. ومعمرك غتحسي باللي عانيتو.. ودابا سيري خرجي من داري .. والفلوس اللي بغيتي تاخديهم خديتيهم..برعي داك الراجل عندك.. وعيشي العيشة اللي باغا.. هبة: راجلي معندو حتى دخل فهادشي اللي وقع..أنا اللي خططت لكلشي.. وأنا اللي تافقت مع شي وحدين كانو محتاجين للفلوس.. أنا بصح أخت ممزياناش ومكيناش شي وحدة اللي ممكن تدير هادشي اللي درت فيك .. ولكن الحقد والحسد عماوني.. كنت ديما تنشوفك عايشة احسن مني.. راجلك تيجيب ليك اللي بغيتي.. تيحتارمك.. وانا ماشي بحالك.. ومللي قالتلي ماما باللي ورتتو تماك مابقيتش تنفكر.. ولقيت باللي دوك الفلوس ممكن يحللو لي أزمة كبيرة ويضمنو لي مستقبلي وتمنيتهم يكونو لي.. وملقيت تاحل من غير نوصي اللي خطف إياد.. وناخد الفدية.. وفاء: مزيان..الله يربحك بفلوس الحرام.. دابا عافاك لما نساي أني ختك. وكوني هانيا مغاديش نقولها لحتى واحد.. غير هو متبقايش تدوري بساحتي.. فلوسنا راك خديتيهم.. وانا حيت نتي ختي.. ماغاديش نبلغ بيك البوليس.. هبة: واخا.. شكراا ..داكشي نيت اللي كنت باغا.. وخاصك تعرفي أصلا أناوعمرني شفتك ختي.. كنتي ديما عدوتي وكنت غير كنافقك..وآه.. واخا تبغي تبلغي بي مغيتيقوش بيك حيت ولدك حداك والارض باسمي.. القانون لا يحمي المغفلين هههه وفاء: برا.. عليا ..حيوانة.. هبة: بشوية أ ختي راني حاملة زعما..ههههههه باااااي..هههههه خبطات وفاء الباب وعنقات سفيان وبقات تتبكي.. سفيان: صافي أحبيبة عافاك متستاهلش منك حتى دمعة.. هاديك متستاهلش أخت بحالك.. وفاء: حتى أنا غنسى أني ختها.. بقات حرقة هبة فقلب وفاء كبيرة.. وحاولات تتعايش مع الفكرة.. واخا صعيب الحال..حيت مكاين مااصعب من الغدر.. من بعد 15 يوم . اتاصلات الواليدة ديال وفاء بيها وفاء: ألو ميمتي.. الواليدة: (تتبكي) وفاء بنتي آجي لعندنا لكلينيك الشارقة راه ختك هبة ولدات وماتت ليها البنية .. ومحنة بزاف معرفناها واش غتعيش تاهي ولا غتموت..أجي أبنتي دابا..
وفاء:واخا أنا جاية.. قالتها لسفيان.. سفيان: شوفي أنا مغنقدر نقوليك والو أ وفاء نتي تعرفي.. وفاء: غنمشي نشوفها واخا كل مادارت في.. سفيان: غنمشي معاك.. وفاء: سبحان الله واخا ماباغاش نتشفى ولكن ربي انتاقم لي منها وحرمها من هاد البنت.. سفيان: يله نمشيو.. مشاو للكلينيك لقاو الكل تيتسناها تفيق من البنج.. ومللي فاقت عاود ليها الطبيب على اللي وقع وقاليها باللي جاتها إموراجي خايبة قبل الولادة .. فاضطرو يولدوها بالفتيح ولكن البنت ماعاشاتش .. وكانت حياتها تاهي فخطر.. بقات تتبكي.. ولكن مقدراتش تغوت حيت الجهد ماكاينش.. وفهاد اللحظة دخلو يشوفوها دارهم ومعاهم وفاء وسفيان.. وفاء: على سلامتك أختي والله يعوضك الطبيب: المشكل أنو العملية كانت صعيبة بزاف.. وبزز باش قدرنا نعتقو المرا .. وكنتأسف نقول باللي مغديش تقدر تولد مرة أخرى حيت استأصلنا عضو مهم من الرحم ديالها.. وفاء: ومعامن تشاورتو؟؟؟ الطبيب: راجلها سنا لينا.. وحياتها كانت أهم من كلشي.. هبة بقات تتسمع ودموعها تيهبطو.. تفكرات أش دارت فختها و تمنات أن الارض تتشق وتسرطها ولا أن ختها تكون واقفة معاها رغم كلشي.. دوزات هبة يومين عاد قدرات تتكلم.. وطلبات من الجميع يخرج ويخليها مع وفاء بوحدهم.. مللي خرجو قالت ليها.. هبة: ربي انتاقم ليك أختي.. وفاء: متقوليش هاد شي نتي دابا مريضة..
بة: أنا تنستاهل أي حاجة طرات لي.. ختي غنكون فقمة الوقاحة معاك وغنطلب منك تسمحي لي عافاك .. وفاء دورات وجهها وبدات تبكي.. هبة: عارفة راسي جرحتك. . وآذيتك ولكن عافاك سمحي لي..غير غنخرج من الكلينيك غنرد لسفيان أرضو .. وغنبعد عليكم.. باش تهناو مني.. وفاء: نتي بصح نادمة؟! هبة: من بعد ما تقتل حلمي فالأمومة صافي .. بنتي اللي هزيت فكرشي 9 شهور ماتت حتى هي.. ماكانش مشرفها تجي للدنيا وتلقى مها هاكة.. شفارة غدارة..عافاك أختي سمحي لي.. وفاء:(قربات وفاء لعند هبة وعنقاتها)مسامحة ليك أختي دنيا وآخرة.. هبة: مغنساش خيرك .. نتي نعم الأخت.. حقكم غيرجع ليكم .. ان شاء الله. سمحو لي وفاش غيكبر إياد غنطلب منو السماحة.. وفاء: سامحتك أختي.. المهم تسامحات وفاء مع هبة.. ونسات الماضي.. ومللي برات هبة ردات ليهم أرضهم .. وتبدلات بزاااف للأحسن طبعا.. راجل هبة.. طلقها من بعد ماوقفت على رجليها.. حيت بغا الاولاد.. وهي تقبلات هادشي.. ووفاء طلبات منها تجي تسكن معاها لكنها رفضات وواعداتها أنها غتبقى تجي عندها مرة مرة.. 
النهاية.. الحقد والحسد تيدي لطريق مسدود.. وربي قادر ينتاقم من كل ظالم..
شاركي على غوغل بلاس