انا وضرتي الجزء الثالث








الجزء الثالث

  ماكنتش كنعرفها مزيان شفتها فدار عجوزتي مرة وحدا ,,خالتي اللي كضل تشكر فيها هيا كبر مني هيا تقريبا قرينة محمد يعني 34سنة كتشرط بزاااف حتى بقات بلا زواج ,باغياه بوكوس وبوكو فلوس ,ملي دوات معاها خالتي وافقات بددون تردد بالسيف حيث بالنسبه لها محمد=بنك متنقل وسخي بزاااف تقدر تستغلو,مهلية فراسها بزااف وعاطاها غير للبس والشعورات ومشتقات ديالهم,ماشي بحالي تافقو على العرس السيمانة الماجية....محمد مابغاش لهم الصداع ودارو ليلة بين العائلة,كلشي ضاحك وفرحان الا محمد انا بزز باش كنبتاسم,حاولت نبق متماسكة ومانبينش الحزن ديالي في حين ان قلبي طايب وباغا نحبسهم ماييديوش ليا الحبيب ديالي....ماما ماععجبهاش الحال وكتقولي بكي غوتي هرسي غير ماتبقايش تردي للذاخل ,قلت لها غير خليني عليك الا قلت ش حاجة محمد ماغيعجبوش الحال ماكيبغش اشوفني باكية ولا مقلقة يقدر يدير شي كارثة ...بقيت ملاهية بالشغل ومرة مرة كنسمع الهضرة عليا من الضياف ومن خالتي الليي كتشكر فبنت ختها وتغامز عليامع صحباتها كنقول ياربي يسالي العرس نمشي للدار.سالا العرس كلها رجع لدارو وخويا رجعني لداري حيت مابغيت نتلام معاه بغيييت نرتاح شوية..ذخلت لللدار هادي اول مرة نبات فيها بوحدي من بعد زواجي غير دخلت لبيتي وانا نتفكر راجلي دابا مع وحدة اخرى فاالفراش..صبرت حتى عييييت وانا نبدا نغووووووت على حر جهدي وبقيت كنبكييييييييييي حتى نشفو دموعي حسييت بحرقة كبيييرة تمنيت نموت ومانشوف هاد النهارلهلا يكتبها على شي مسلم ...انا ماشي قوية كفاية حتى نقبل ضرة تدخل عليا لا اضطريت نضحي حيت مابغيتش راجلي اتخاصم مع امو بسبابي وتسخط عليا دنيا واخرة ..مابغيتش نحرمو من ولاد من دمو مابغيتش نكون انانية..المجتمع ماكيرحمش المراة حيت بالنسبة لو هيا كائن ضعييف ماعندوش الحق ادافع على راسو ...وصلات 3 دليل وانا مازال بلاصتي صونا تلفوني وكان محمد مابغيتش نجاوبو ولكن انا محتاجة نسمع صوتو اكلامو كيعطيني القوة جاوبت وبقييت ساكتة كنتصنت لو بقا كيبكي ويقولي سمحي ليا عفاااك احياتي انا ماكنستاهلكش كلامو كيدخل فقلبي بحاال شي سكين صوتو مخنوق كيطلب مني السماحة ,وكيقولي انا مابغيتش راكي عارفاني مرغم,نتي الوحيدة اللي فقلبي غوتي عليا نستاهل مي ماتبقايش ساكتة سمعيني صوتك.........بقا كيتكلم وانا كنسسمع ونبكي فصمت باش مايسمعنيش حتى دااني النعاس فيقني صوت ادان الفجر,نضت توضيت وصليت,بدلت حوايجي وهزيت المدكرات ديالي بقيييت كنكتب كلشي الكلام الي ماكنقدر نصارح بيه الناس,لقيت الملجأ ديالي فالكتابة,رتاحيت ملي خرجت كلشي لي فقلبي ,ماقدرت ناكل والو تسنيتو يرجع مارجعش حتال الغد...سمعت الباب حليت لقيتها هدى(ضرتي) دخلات مديت وجهي نسلم وهيا تبعد ومدات يدها تقريبا يلاه قاست يدي هي تبعد بحال اللي خافت نلصق فيها الجدام واقييلا ماعلناش بدات كتسارا فالدار هناولهيه دخلات مدرما لبيتي هيا تعيط عليا قالتلي شوفي خوي هاد البيت من اليوم غايولي ديالي,بقيت غير كنتعجب هادي مالها جاية محيحة,شوفي هاد بيتي وراهوا بيتك لديك الجيه مفرش ومقاد قالتلي ماكيهمنيش بغيت هاد البيت اللي فيه البالكون دخل محمد سولنا مالكوم بغت نقول ماكاين والو لقيتها سبقات قالتلو حبيبة انا بغيت هادا حيث كنضيق محمد تزنك وانا نخرج للكوزينة كنوجد الفطور..منعها تجي لببيتي ,حطيت الفطور مابغاش ادوز ليا ومحمد بحالي ماكلاش عكس شي بعضين بقات كتخشي فوجها طول وعرض ههه جابتلي الضحكة حيت بحالي كانو حابسينها بلا ماكلة صدقو ملي قالو كثرة الهم كضحك,ساليت شغالي ودخلت لبلاصتي جا محمد عنقني حتى بديت نبكي قالي غير صبري دابا يدير ربي شي تاوييل دالخير انا غنبقى نبغيك واخا نتزوج عشرة وبقينا مجمعين حتا دخللات هدى قالتلنا كفاش زعما مجمعين هنا وانا بوحدي,,جيت بغيت نوقف جلسني قالها سكينة راها مراتي ياكما نسيتي وهيا تخرج زعفانة قالي ردي البال راها أكبر مسمومه فالعائلة تقدر تدير اي حاجة باش تاخد اللي بغات,قالي ماشي مهم من بعد,راه تشطنت دابا اشنو تدير,قرب ليا و قالي نساي داكشي قالي زعما ماتوحشتنيش قتلو نوو ,ياكي كتكدبي عليا انا بعدا تَوَحَشْتُكِ وحشاً كبيراً ههه ....غير خرج هيا دير لالا مولاتي الشعبي وعطاتها للردييح بوحدها ماهمها حد ماشي بحالي انا هزاها منين تقالت هيامازال عروس جديدة,خليتها وخرجت نتقدا ملي رجعت لقيت خالتي جات ثاني ,كدوي مع هدى  ونا لجالسة كنتصنت كاع ماعبراتني قلتلها جلسي تغداي مابغاتش تجلس وصلتها لباب,هيا تقولي سيري عند امك جلسي عندها شي سييماانة خلي العرسان ياخدو راحتهم شويه ...اناري اش كتقول هادي انا كنتعجب لديك يومين نزيدها سيمانة شنو درت ياربي حتى سلطتي عليا هاد المراة  لي مكتحس اوووف هاد العجوزات ماعندهم قلب ,واخا اخالتي مايكون غير خاطرك خرجات ضاحكة وتاتها ,دازت 3ايام والاخرى كتخرج تاكل وطلق شي معيورة وترجع الكاس مااكتهزو من بلاصتو الا بغات تشرب كتعيط لسكينة السخارة ديالها ....عييت منها ومن كلشي قلت نخوي لها تاصلت بماما قلتلها نجي ورحبات بالفكرة مي محمد مابغاش يلاه ويلاه ماقتانع داني لدارنا وعطاني شي باركة وقالي الا خاصاك شيي حاجة قوليها لي 
محمد : انا غنبقى ندوز الا ساليت..جلست معا ماما فرحات بيا ولكن عيالات خوتي بجوجات كيبقاو احشيوو فالهضرة ويضحكو عليا,ماتسوقت لهم سكت ولكن امي الا سمعات شي حاجة  كتعطيهم علاش ادورو.هييا قاسحة كون غير شبهتلها ..قدر الله وماشاء فعل لعله خير..سولاتني على احوالي كنقولها مزيانة ولكن قلب الام كانت حاسة بيا بعد االضغط ديالها قررت نعاود لها كلشي وشاركتها همي ,,بقات تبكي وتنوح كتقولي الله يابنتي ماعندك زهروصاتني مانبقا نسكت الصراحة عندها الحق بنادم ملي كيلقاك ساكت على حقك كيولي مسيطر ويستغلك فقضاء اغراضو قراتني مزيان وقررت نطبق نصيحتها حيث عيييت واللي داز عليا ماشي قليل,, فالدار هدى مالقات علامن تخلي الشغالات وطيبات لهم غدا من داكشي الروز وامليط وعلى ماقال محمد مافيه مايتكل السيد موالف بالشهيوات ماكلا غير بزز داز عندي لقاني ماتغديتش حيت مابقاتلي شهية سولتو واش كلا شي حاجة هوا يعاودلي على الروز وبقينا نضحكو قالي هاديك كتعرف غير المكياج والدوران و الشطيح ههه نضت صاوبتلو البيض ومطيشة حيت مشا عليه الحال وحتى الماكلة ديال الزنقة ماعندو معاها سالينا وطلبني نرجع معاه مابغتش وطلبتوو يخليني مازال شي ياامات وهنا تقلق مني سولتو مالك احبيبة قالي محمد:مابقيت فك انا ليمخلياني  بوحدي قلتلو:نتا ماشي بوحدك معاك مراتك,,محمد:نتي هيا مراتي هدى عروسة امي,,,انا:اناوياها بجوجات عيالاتك قداام الله خاصك ديرها فبالك خرج وخلاني ...كنخمم كيف كنت وكيف وليت كون قزدرت وجهي مع العجوزة من الاول كوراني دابا بخير مع راجلي مي الحشمة والسكات مع انعدام الثقة فالنفس هما لوصلوني لهاد المواصييل,,كان كل همي نتززوج من بعد بغيت نولد ودبا كنطللب ربي غير راحة االبال حت حد مالقااها كي بغاها..الحمد لله على كل حال
دوززت واحد15 يوم محمد مرامرا كيتغدا معايا وكيخرجني بديت كنتقبل الفكرة مع الوقت وصل وقت الرجوع للدار او بالاحرى الرجوع للمشاكل والنقاشات التافهة.خرجت تقديت بزااف دلحوايج ومشيت بدلت اللوك ديالي تاصلت به يجي يديني ماكان مسالي قالتلي امي سيري خودي لو كادو وصاوبي شي حاجة فاجئيه بها وداكشي نيت طلبت خويا يديني حيت راجللي ماكيبغيش يخليني ناخد الطرنسبور بوحدي وصلنا الدار عييت معاه يدخل مابغاش..حليت الباب ماسمعت حتى شي حس الحمد لله غنوجد على خاطري يلاه دخلت لبيتي كتبان ليا هدى هازة واحد المجمردايرا فيه شي بخور خانزين وكترش ناموسيتي بشي حاجة ومعرفت شنو كانت كتبركم بقيت ماقبلاها شي 10دقايق وهيا كتخربق غير شافتني تيدلو فها اللوان بقات حالة فيا فمها سولتها شنو جاية ديرسكتات قلت لها اخر مرة تبخري بيتي ماعنديش مع البخور وقالتلي لا راه غير بغيت نحيد الرطوبة ..الله يجعلني نتيق بدلت الملايه ووجدت راسي مزيان ملي يجي راجلي يلقاني 5\5 تسنيتو يجي مي تعطل بزاف موالف يجي مور العشاء وصلات 11 مابان تاصلت به قاالي راه عند صحابي وانا نقوولو خسارة انا فالدار قطع وجالعندي كان فرحان والفرحة باينة فعينيه وزاد ملي شافني بانيولوك قطعت شعري وصبغتو,درت الصوان وقاديت راسي حتى بنت قرطاسة ,توحشت راجلي بزاااف دوزنا ليلة واعرة دوشنا قبل الفجر تفاديا للملاحظات السخيفة من هدى,نعست مرتاحة فالصباح هدى ماعجبها الحال هدى:شوفي بلا ماتفرحي بزااف وستغلي مزيان هدالوقت اللي بقالك راه ماغتبقايش تباني لو من بعد..مافهمتهش شنو قصدها ديري اللي فجهدك وخلتها كتقلى بالسم حيت مامولفة تسمعني نجاوب علليها.ذخلات عندي للكوزينة ووبلا حشما بلا حياء قالتلي انا تشهيت كسكسو طيبيه لنا,ضرت لعندهاا قلت ياكما قالولك عليا خدا متك راه حنا هنا بحال بحال ومن اليوم خاصنا نديرو النوبة فكلشي الطياب الجميع وحتى محمد  قالتلي لا ميمكنش قلت الا ماعجبك هاد الحل كل وحدا تعزل ماكلتها مفهوم ماعجبها كلامي دخلات بيتها حتى وجدت لماكلة هي تخرج حبيبه وجدتي لغدا بقات كتعِوْجْ ...وي حبيبه موجود مي ماغاديش تحطي فيه يدك حتى تعطيني قراررك ههه سسكتات شوية واستسلماات الجوع مايشاور قبلات بالعرض عجبني الحال حيت واخيرا قدرت نمشي كلامي على شي حد الارشااداات ديال امي مامشاتش هوكاك ههه  بديت كنتوالف نعيش مع الضرة ونتقاسم معاها داري وراجلي..حياتي كاملة تبدلات من نهار دخلات لها لسوء الحظ تبدلات للأسوء اصعب حاجة هي تجبرك الظروف تقببلي بامرة اخرى تاخد لك راجلك ..كتبقاي غادا والناس كينعتو عليك لطالما سمعت عبارات جارحة من الناس وبالاخص القراب..كيقولو عاقرة وزوجات راجلها حيت عارفة راسها الا طلقات ماغاديش يديها فيها حتى واحد ,ماعارفينش بلي انا ماشي عاقر ولو ان عجوزتي ماتدخلاتش بيني وبين راجلي ماكانش غايفكر اجيب عليا الضرة والا بغا الولاد كاينين حلول اخرى من غير هادا.....بدينا كنديرو النوبة فكلشي فنوبتها كانت مرة دير حاجه خفيفة مرا دير راسها مريضة حتى نحط الماكلة وتبرى ههههه انا ومحمد ضروري نديرو السُكور غير كدوز وقت الشغل واهيا ثاني كدردك بالشعبي طبعها صعيب مرات ملي كيكون محمد كتولي ضريييفه غير يدور مع الباب ويسخط عليا الله ونقول كلمة كتشعل معايا,واحد النهار خرجت للحمام ملي رجعت بغيت نتكا فبيتي كيبان ليا واحد الخيط خارج من الوسادة جريتو لقيت واحد التخربيقة مجموعة بحال الكموسة..تخلعت هزيتو حطيتو فالماريو ورجعت تكيت ووالو النعاس مابغاش يجيني ,ذخل راجلي تعاملت عادي مابغيتوش يعرف. الغد فالصباح بكري خرجت وشديت طاكسي لعند امي غير وريتها داك العجب تخلعات,ماما:اولي يا الزغبية واش لقيتي هاد العجب ومازال مخبياه فالدار..انا قلت موحال يكون كيفما كنفكر داكشي لاش خليتو وزايدون انا ماكنامنش بالشعوده...ماما:زيدي قدامي عارفة راسي والدة غير هبيلة راه السحر حق..زيدي لدار الفقيه اللي حدانا يحل هاد العجب الله يخرج هاد النهار على خيرحنا من عائلة متدينة وماكنمشوش عند الناس ديول الشعودة والسحر لما في الامر من شرك بالله .....ذخلنا عند الفقيه اللي كان انسان متدين وكيخاف الله كيدير غير االرقية وريتو داك العجب وبدا كيقرا عليه القران وحلو لقا ورقة مكتوبه فيها كتبة مامفهوماش سولني شكون سكينة ومحمد سولتو كيدار حتى عرفهم قالي راه ابنتي هادش اللي جبتي راه شي حد داير سحور لهاد الجوج باش يتفارقو ويكرهو بعضهم. ..وشكون دار هادشي قالي حاجة وحدا اللي عرفت وهي اللي دار الفعلة ماكيخاف لا ربي ولا عبدو وخاص هاد الجوج ييردو بالهم قالتلو امي راه بنتي وراجلها لمن تدار قالي شوفي ابنتي الا مازال لقيتي شي حاجة ماعليك غير ديري كيف درت وغادي تبطلي المفعول ديالو والدار خاصها تخمل وتشوفي ياكما كاينة حاجة اخرى ماتبقايش تاكلي اللي لقيتي راه ماشي كلشي باغي لك الخير ..حاولي ديما ديري القران فالدار وماتحاوليش تواجهي مول الفعلة راه يقدر يدير لك ماكتر....تخلعت وكللامو اثر فيا بزاااف ولاد الحرام كثارو مابغيتش نضلم هدى ولكن راه شفتها بعيني ملي كانت كتبخر البيت حقدت عليها حيث عمري درت لها شي حاجة كنت كنحتارمها تساؤلات كثيرة دارت ليا فراسي بغيت نعرف الاجوبة ديالها...مديت يدي نخلص السيد :مابغاش الفقيه:حاشا ابنتي نشد عندك شي حااجة انا درتها لوجه الله نوصيك تخلي ايمانك بالله قوي وماتنساي "لن يصيبنا الا ماكتبه الله لنا"رتاحيت ملي سمعت هاد الاية شكرتو وخرجت مرتاحة وحمدت ربي وشكرتو حيت لقيت هاد العجب..رجعت عند امي وبقات توصي فيا وتهدني طليت على ساعتي لقيت الوحدة ناري هادي اللخرة ليا محمد غايجي مايلقانش تلفوني خليتو فالدار ..ماكنخرج بلا شوار الراجل

يتبع....

شاركي على غوغل بلاس